Jólatrésdúkur

Jæja, nú gengur þetta ekki lengur....alveg að koma jól og engin almennileg jólafærsla komin.  En ég lofa betrum og bótum !!

Ákvað í dag þar sem við vorum að skreyta jólatréð okkar að sýna ykkur jólatrésdúkinn okkar sem ég saumaði sjálf (sem er alveg ótrúlegt hjá konu sem saumar ekki né prjónar !!).  Hreindýraæði byrjaði greinilega snemma hjá mér en ég saumaði dúkinn fyrir jólin 2003.  Hugmyndina fékk ég í Marie Claire idees jólablaði.

Hér er svo dúkurinn.  Ætlaði víst alltaf að ganga frá kantinum en það hefur ekki verið gert ennþá og algjörlega óvíst hvort það verði gert í framtíðinni ;-)

 

 Hér er svo jólatréð komið á dúkinn, kannski ekki alveg fallegasti fóturinn en hann týnist í pakkaflóði !

Hugmyndin úr jólablaði Marie Claire idees 2003.  En hreindýramunstrið var upphaflega á dúk sem er líka mjög flott en ég ákvað að hafa það á jólatrésdúknum.

 



 

...og hérna er tréð svo á dúknum og systurnar að skreyta það !

Svo er smá forsmekkur á gleðinni í næsta pósti, jólaskraut og jólagleði.

Myndin er tekin með nýju linsunni minni (Canon 50 mm 1.4) sem ég fékk loksins í dag.  Hún lofar mjög góðu og lofa ég fullt af skemmtilegum myndum á næstunni :-)



Þangað til næst......túdúlúúúú

Þegar piparkökur bakast.....

Jæja, 1.desember í dag og allt að detta í jólagírinn. 

Á jóladagatali stelpnanna var piparkökubakstur á dagskránni :-)

 

Get ekki beðið eftir nýju linsunni minni sem er á leiðinni til landsins, þá verður gaman að taka myndir !

 

 

Gamaldags jólamyndir

Vildi bara leyfa ykkur að njóta þessara fallegu gamaldags jólamynda.  Er búin að vera á fullu að safna gömlum "vintage" jólamyndum á pinterestinu.  Flottar og fallegar myndir til að prenta út í allskyns jólaverkefni, eins og t.d. merkimiða á jólapakkana (gerði það í fyrra) og svo virðast allir vera að gera flott jólakerti (þar á meðal ég ;-)) og eru þessar myndir tilvaldar í það !

 

 

Finnst ykkur þær ekki fallegar ?  Maður kemst alveg í jólagírinn :-)

 

Fullt meira hérna !

Lægð

 

 

Ekki alveg duglegasti bloggarinn í bænum og má segja að ég sé í talsverði lægð ! En hugurinn er á fullu þessa dagana að skipuleggja fyrir bústaðinn, vetrarskreytingar í stofunni, jólagjafahugmyndir og skreytingar, jólakortapælingar og meira og meira.  En ég mætti kannski vera duglegri að framkvæma....hehe....en það fer tími í heimildarvinnuna, er á fullu að finna hugmyndir á pinterestinu ;-)

 

En kannski ég hendi bara inn einni uppskrift af túrillunum mínum góðu.  Þær eru mjög góðar og fínar t.d. í saumaklúbbinn, á ættarmótið, í útileguna, á bekkjarkvöldið eða hvað sem er :-)

Túrillur

2 pakkar tortillur

1 dós sýrður rjómi

1/2 flaska grænmetissósa (E.Finnsson)

1 lítil dós rjómaostur

1 Púrrulaukur

Ostur

Salsa sósa

 

Hrærið öllu sósugumsinu saman, skerið púrrulaukinn smátt og blandið saman við.  Smyrjið tortillukökurnar, setjið sneiddan ost yfir og lokið með annari köku. Skerið svo samlokurnar í sneiðar. Gott er að setja samlokurnar í kæli og skera þær kaldar, þá verða kökurnar mýkri og sósan fer eki út um allt. Berið svo fram með salsa sósu.

 

 

Matarblogg

Ég (eins og kannski flestar aðrar konur ;-)) elska að skoða uppskriftir og hvað þá að elda eitthvað nýtt og ljúffengt.  Í dag er til svo mikið af skemmtilegum matarbloggum með ótrúlega mikið af skemmtilegum og girnilegum uppskriftum.  Ég á þrjú uppáhalds matarblogg sem ég skoða reglulega og hef prófað nokkrar uppskriftir þaðan.

 

Fyrst má nefna Ljúfmeti og lekkerheit.

Ég man þegar ég skoðaði þá síðu fyrst, þá var fyrsti dagurinn minn í átaki....ekki góð hugmynd...hehe.  Allar uppskriftirnar svo girnilegar og er ég búin að prófa þónokkrar og eru allar alveg ótrúlega góðar.  Sú uppskrift sem ég hef gert oftar en einu sinni og oftar en tvisvar er Möndlukakan góða.  Mæli með henni, mjög einföld, fljótleg og ljúffeng.  Uppskrift hér.

 

 

Næst vil ég nefna Eldhússögur.  Enn og aftur, alveg ótrúlega girnilegar uppskriftir.  Uppáhalds uppskriftin mín þaðan er án efa Kjúklingasúpan með eplum, karrý og engifer.  Ein besta súpa sem ég hef smakkað og maðurinn minn gekk svo langt að segja að þetta VÆRI besta súpan sem hann hefði smakkað.  Uppskrift hér.

 

 

Svo er það hún Eva Laufey Kjaran.  Ótrúlega fallegt matarblogg með flottum "skref fyrir skref" myndum.

 

Ef þið eruð með matarblogg eða fylgist með einhverjum skemmtilegum matarbloggum þá megið þið endilega láta mig vita og ég bæti þeim við listann minn.

 

Einnig langar mig að segja ykkur mataráhugafólki frá einni snilldarsíðu sem heitir Tastebook.  Það er síða sem heldur utanum allar uppáhalds uppskriftirnar þínar.  Ég er búin að setja um 100 uppskriftir inn á mína síðu.  Uppskriftirnar mínar get ég því nálgast hvar sem er (ef ég kemst í tölvu) og svo get ég deilt uppskriftunum mínum með vinum og vandamönnum.  Svo er hægt að panta uppskriftabókina sína og maður fær uppskriftasafnið sitt í fallegri gormabók.  Algjör snilld !!

 

 

Jæja og svo í lokin langar mig að prófa að vera lítill matarbloggari.  Þetta blogg er hvort er eð stefnulaust og hví ekki að blogga um mat líka ;-)

 

Ég fór í vinasaumaklúbb í gær þar sem við áttum allar að koma með eitthvað á borðið.  Ég ákvað að koma með Basilbollurnar góðu.  Þær fékk ég upphaflega í saumaklúbb hjá Díönu vinkonu minni og kemur uppskriftin úr Gestgjafanum. 

 

 

 

Basilbollurnar eru rosalega góðar og er komin hefð hjá okkur að baka þær á Bolludaginn í stað hinna hefðbundnu bolla.  Mjög einfaldar og góðar.

 

Innihald:

250 ml mjólk

100 g smjör

1 tsk salt

150 g hveiti

100 g rifinn ostur (Ég nota bara heimilisost 26%)

3-4 egg

lúka ferskt basil (mér finnst gott að hafa nóg af basil)

 

Aðferð:

Hitið ofninn í 190°. Setjið mjólk, smjör og salt í pott og hitið að suðu. Hrærið í þar til smjörið er bráðið. Setjið þá hveitið út í, takið af hitanum og hrærið rösklega þar til deigið sleppir börmunum. Látið kólna smástund og hrærið svo eggjunum saman við einu í senn. Deigið á að vera svo þykkt að það haldi lagi og e.t.v. þarf aðeins að nota hluta af seinasta egginu. Hrærið ostinum saman við og síðan fersku basil. Mótið kúlur úr deginu með tveimur teskeiðum og raðið þeim á pappírsklædda bökunarplötu. Penslið bollurnar með með eggjarauðu og bakið þær í miðjum ofni í 20-25mín eða þar til þær hafa tekið góðan lit og falla ekki (takið eina út til að prófa).

 

 

Verði ykkur að góðu :-)

Kristín

Kertaarinn

Jæja, nú er haustið komið í bústaðinn okkar og þá er ekkert meira kósý en að kveikja í kertum og draga fram teppið og góða bók :-)

 

Það var alltaf á planinu hjá okkur að fá okkur kertaarinn í bústaðinn eins og við erum með heima (sjá hér).  En úrvalið af svona örnum er ekkert rosalega mikið og verðið eftir því.  Ég sá einhvern sérsmíðan kertaarinn sem kostaði hátt í 150 þúsund krónur og vorum við ekkert mikið til í að eyða svo miklu þannig að það var á planinu í vetur að smíða svona arin sjálf. 

 

En svo sáum við þennan líka fína ódýra arinn auglýstan í Byko á aðeins 27.900 kr og vorum við ekki lengi að stökkva á hann og hann líka svona smellpassar í bústaðinn :-) Það var hægt að kaupa rafmagnseldstæði inn í hann en við þurftum hann ekkert !

 

Á aðeins eftir að skreyta meira í kringum hann, tók bara það sem ég átti heima, nokkra lurka og kertaluktir.

 

Kemur hann ekki bara vel út ??

 

 

Lurkarnir klikka ekki !!



 

 

Fínar litlar kertaluktir sem ég keypti í Ilvu í fyrra á góðu verði fyrir jólin.

 



 

Já og þetta eru nýjustu meðlimir fjölskyldunnar, rollurnar okkar :-)  Ég gjörsamlega féll fyrir þeim  í aðalbúðinni á Snæfellsnesinu, Blómsturvöllum á Hellissandi, æðisleg búð !!  Finnst þær koma vel út á arinhillunni.

 

 

Svo er líka svona kósý þegar rökkrið skellur á.

 

 

 

 

 

Sem sagt, algjör sæla með nýja kertaarininn okkar :-)

 

Svo væri gaman að fá smá "komment" frá ykkur kæru lesendur.  Á góðum dögum koma tugir heimsókna á síðuna mína en kannski bara einn kvittar fyrir sig (og yfirleitt alltaf þeir sömu).  Veit ekki hvort ég nenni að setja eitthvað hérna inn ef enginn hefur áhuga á að lesa blaðrið í mér ;-)

 

Góðar stundir !!

Edit 17.febrúar 2013 - Sé að það eru rosalega margir sem koma inn á þennan póst hjá mér og hef ég líka fengið nokkrar fyrirspurnir um arininn og hvar ég hefði fengið hann.  Ég sá á Blandinu að það er uaðilar sem er að smíða svona kertaarna fyrir sanngjarnan pening.  Notendanafn þeirra er grrkn, Bíll 27, heimförin, SaraBjort06.